Uashington - Këngëtarja e famshme kolumbiane Shakira ka një detyrë të re: një vend në komisionin këshillimor të presidentit amerikan Barack Obama për arsimimin e hispanikëve.

Fituesja e disa çmimeve Grammy mori pjesë në një ceremoni ku bëri betimin si anëtare, një diskutim ekspertësh dhe në një konferencë shtypi dje në Washington, ku foli për rëndësinë e arsimit parashkollor.

“Shpresoj që përmes pjesëmarrjes në këtë komision të mund të këmbej mendime për atë që kam mësuar vitet e fundit duke punuar me fëmijët në Kolumbi dhe në Amerikën Latine”, tha Shakira, transmeton “noa”.

Ajo shtoi se investimi më i mirë dhe më i shpejtë është investimi tek fëmijët, sidomos kur janë shumë të vegjël.

Komisioni i ri do ta këshillojë presidentin amerikan për çështjet e lidhura me suksesin akademik të të rinjve hispanikë.