Prishtinë, 25 maj – Njëlloj “pastrimi etnik” të veriut nga shqiptarët, kësaj radhe nëpërmjet blerjes së pronave shqiptare, është shndërruar në temë zgjedhore për zgjedhjet lokale të Serbisë, që do të mbahen në Mitrovicë, edhe pse janë shpallur ilegale nga Qeveria e Kosovës, ndërsa prania ndërkombëtare ka thënë se rezultatet e tyre nuk do të njihen.
Ish-kryeministri serb, Vojislav Koshtunica, si dhe lideri radikal Vojislav Sheshel, kanë paralajmëruar se programi i tyre për qeverisjen e Mitrovicës nënkupton edhe blerjen e pronave shqiptare në veri, për të siguruar kontroll dhe ndikim të plotë serb në këtë pjesë të Kosovës.
Derisa Koshtunica thuhet ta ketë bërë të ditur këtë synim të tijin në takimet zgjedhore që ka mbajtur në Mitrovicë, këtë fundjavë Shesheli projektin e tij zgjedhor e ka elaboruar përmes një letre dërguar qytetarëve serbë në Mitrovicë, e cila thuhet të jetë shpërndarë nëpër qytet ditët e fundit.
Pas Koshtunicës dhe Sheshelit në garën zgjedhore, që është shpallur si e paligjshme nga institucionet e Kosovës dhe prania e BE-së në Kosovë, po futet edhe ish-bashkëpunëtori i ngushtë i Sheshelit, tani një prej rivalëve më të mëdhenj të tij, Tomislav Nikoliq, me Partinë e tij Progresive të Serbisë.
Sipas paralajmërimeve, të martën në Mitrovicë partia e Nikoliqit do të mbajë një tubim zgjedhor në qendër të qytetit, ndërsa për këtë gjë e ka njoftuar edhe Policinë e Kosovës, përkatësisht Stacionin e PK-së në veri.
Në njoftimin dërguar policisë nuk bëhet e ditur nëse edhe vetë Nikoliqi do të jetë prezent.
“Të nderuar, ju njoftojmë dhe ju paralajmërojmë edhe një herë për mbajtjen e tubimit parazgjedhor nga Partia Progresive e Serbisë më datë 25.05.2010”, thuhet në letrën e SNS-së drejtuar Policisë së Kosovës, me të cilën, për më tepër, kërkohet edhe sigurimi i këtij tubimi nga Policia e Kosovës.
E pyetur nga “Koha Ditore” nëse do të lejojë apo edhe sigurojë një tubim zgjedhor për zgjedhjet që janë shpallur ilegale, Policia e Kosovës ka thënë se nuk do të ofrojë siguri për fushata në kuadër të procesit që tashmë është shpallur ilegal nga Qeveria e Kosovës.
“Sidoqoftë, në rast se ka ndonjë rast të raportuar të prishjes së rendit dhe qetësisë publike, ose rrezikohet jeta e ndonjë qytetari, Policia e Kosovës do të ndërhyjë”, ka thënë Arbër Beka, zëdhënës i Policisë së Kosovës.
Burime të gazetës kanë bërë të ditur se të martën në Kosovë do të qëndrojë edhe zyrtari i lartë i Partisë Demokratike të Boris Tadiqit, Milovan Gjilas, që është prefekt i Beogradit, dhe i cili thuhet të ketë marrë lejen për qëndrim në Kosovë përmes pranisë ndërkombëtare.
Ndonëse i kanë shpallur ilegale, asnjëri nga mekanizmat ndërkombëtarë e as Qeveria e Kosovës nuk kanë shprehur ndonjë intencë që të ndërmarrin masa për të pamundësuar mbajtjen e këtyre zgjedhjeve të dielën e ardhshme, me arsyetimin jozyrtar se dhuna nuk është zgjidhje për ndaljen e këtij procesi ilegal.