Ndihmës sekretari i Shtetit për Byronë e Narkotikëve Ndërkombëtarë dhe për Çështjet e Forcimit të Ligjit (INL), David T. Johnson do ta vizitojë Kosovën më 10 dhe 11 qershor, njofton Departamenti Amerikan i Shtetit.
Siç bëhet e ditur, Johnson do ta vizitojë Bullgarinë më 7 dhe 8 qershor ku do të takohet me kryeministrin e vendit, Borissov dhe me liderë tjerë të lartë të qeverisë së porsazgjedhur bullgare për të dëshmuar edhe njëherë përkushtimin amerikan për Ballkanin Perëndimor.

Më pastaj, Ndihmës Sekretari Johnson do ta udhëheqë delegacionin e SHBA-ve në takimin SHBA-BE të Trojkës mbi Drogën më 9 qershor në Bruksel.

Në fund të vizitës së tij, ndihmës sekretari i Shtetit, Johnson, do ta vizitojë edhe Kosovën më 10 dhe 11 qershor. Ai pritet ta ritheksojë përkushtimin e SHBA-ve në mbështetjen dhënë Qeverisë së Kosovës në sundimin e ligjit, duke theksuar zotimin amerikan për të bashkëpunuar në çështjet që kanë të bëjnë me sundimin e ligjit.

Në takimin me zëvendëskryeministrin e Kosovës, Hajredin Kuçin, dhe me liderë tjerë të lartë, Johnson do ta theksojë edhe nevojën për ta luftuar korrupsionin në të gjitha nivelet.