Sot, ju mund të ndjeheni të zhgënjyer, sepse sot ka një krizë besimi ndaj politikës. Ju nuk jeni ende plotësisht të sigurt nëse Qeveria e mendon atë që e thotë kur deklaron se do të ballafaqohet drejtpërdrejt me korrupsionin dhe do ta çrrënjosë atë nga sistemi- kanë qenë fjalët e kryeministri Hashim Thaçi drejtuar qytetarëve nëpërmes një video-fjalimi të transmetuar në televizionet nacionale.
“Më vjen keq që nuk ia kemi arritur që t’iu bëjmë të ndjeheni më të sigurt, por ju siguroj se ne nuk e tolerojmë korrupsionin, ashtu siç nuk e toleroni ju. Institucionet e Kosovës, do të jenë në vijën e parë në luftë kundër korrupsionit. Nëse dyshimet aktuale do të dëshmojnë se janë bërë keqpërdorime, ne do të ndërmarrim masa të menjëhershme ndaj atyre që gjenden fajtorë. Kjo është ajo çka ju prisni nga ne dhe çka ne kërkojmë nga vetvetja”, ka thënë Thaçi.
Kryeministri ka thënë se Qeveria do të punojë me EULEX-in dhe me partnerët të tjerë ndërkombëtarë në ndërtimin e një sistemi të drejtësisë me qasje të barabartë për të gjithë qytetarët e Kosovës.
Thaçi ka përmendur se GJND pritet ta japë opinionin e shumëpritur për shpalljen e pavarësisë së Kosovës, ndërsa ka thënë se “çfarëdo që të jetë vendimi, ne duhet të vazhdojmë të ecim përpara dhe ne do ta kemi mbështetjen e miqve dhe partnerëve tanë. Por, ne duhet të përgatitemi për një sfidë të re që vjen nga Beogradi”.
Kryeministri ka thënë se Kosova asnjëherë nuk do të negociojë për pavarësinë apo integritetin territorial, duke qenë se “Kosova është një dhe Kushtetuta e saj do të zbatohet në mënyrë të barabartë përgjatë gjithë territorit të këtij vendi”, dhe se Qeveria e tij “asnjëherë nuk do të pajtohet për t’i rihapur këto çështje, të cilat janë vendosur fuqishëm dhe njëherë e përgjithmonë”.
Kreu u Qeverisë e ka qartësuar orientimin për t’u bërë anëtarë të NATO-s dhe BE-s, dhe në këtë drejtim, Qeveria “është duke punuar me BE-në në përgatitjen e procesit, i cili do të na shpie drejt anëtarësimit dhe unë shpresoj që liberalizimi i vizave do të jetë përfitim i parë kësaj përpjekjeje”.
