Zëvendës sekretari amerikan i Shtetit, James Steinberg ka thënë se qëndrimi amerikan mbi statusin e Kosovës së pavarur nuk do të ndryshojë. Steinberg është shprehur se, nuk duhet të ketë paqartësi lidhur me qëndrimin amerikan se Kosova është e pavarur dhe sovrane. Kjo, sipas tij, “nuk do të ndryshojë”.
Por ndërkohë që punohet për këto çështje afatgjata, Steinbergut, në një intervistë për Zërin e Amerikës, ka thënë se ka rëndësi që të ketë njëfarë bashkëpunimi praktik mes Kosovës dhe Serbisë. Sipas tij, është në interes të të gjithëve zgjidhja e çështjeve të tilla si kufijtë dhe doganat apo telekomi.

“Nëse ndjekim qëndrime pragmatike, pra që palët të bien dakord për të mos qenë dakord për gjithçka, e në të njëjtën kohë të bëjnë gjëra në interes të të gjithë popullit duke çuar në më shumë e jo në më pak bashkëpunim, kjo do të ishte diçka e mirëpritur”, ka porositur ai.

Nënsekretari amerikan i Shtetit iu referua po ashtu zërave që dëgjohen kohët e fundit lidhur me të ashtuquajtura plane për ndarjen e Kosovës. Ai tha se një ndarje as që diskutohet.

Steinberg ka thënë se në Kosovë po bëhet përparim në zgjidhjen e problemeve të brendshme të vendit, megjithëse – sipas tij – ndërtimi i shtetit është një sfidë e vështirë. Megjithatë, Steinberg ka potencuar se liderët e Kosovës duhet të ndërtojnë institucione të forta shtetërore, ndërsa korrupsioni, që sipas tij, është një problem i madh në të gjithë Ballkanin Perëndimor, “është një problem i veçantë në Kosovë”.

“Prandaj ne duhet të punojmë me ta. Ne kemi një numër programesh në Shtetet e Bashkuara për të fuqizuar sundimin e ligjit atje. Por në tërësi ata mund të vlerësohen me një notë të mirë për përpjekjet e tyre”, ka thënë ai. /Telegrafi/