Ministria e Arsimit publikoi të martën rezultatet e Testit Kombëtar të Maturës. Kryetari i Komisionit Qendror Shtetëror të Maturës, Nehat Mustafa tha se 64.3 për qind e maturantëve e kanë kaluar testin. Ai tha se për shkak të parregullsive testi është pezulluar në tri qendra të testimit, ku do të rishqyrtohen rezultatet.
Kryetari i Komisionit Qendror Shtetëror të Maturës, Nehat Mustafa, tha se ky rezultat është i kënaqshëm. “Kemi një për qind prej 64.3 për qind, natyrisht ne jemi të kënaqur me këtë sukses dhe kemi varjet se kemi një ndryshim pozitiv bukur të madh në krahasim me vitin e kaluar, dhe konsiderojmë se kjo ngritje ka ardhur si rezultat i punës që është bërë nga Ministria e Arsimit, nga drejtoritë komunale të arsimit po dhe nga shkollat”, tha Mustafa.

Mustafa bëri të ditur se në 3 qendra të mbajtjes së testit të maturës, testet janë pezulluar, për arsye siç tha ai, ka dyshime dhe parregullsi. Qendrat ku janë vërejtur parregullsi janë: në komunën e Gjilanit, Deçanit dhe të Podujevës.

“Ajo çka ne kemi hetuar edhe këtë vit si defekt, është papërgjegjësia e një numri të madh të administruesve, dhe dihet se që administrues dhe vëzhgues janë qenë mësimdhënës të cilët i kanë propozuar drejtorit komunale të arsimit pas propozimeve që kanë marr nga ana e drejtorëve të shkollave. Edhe kësaj radhe u vërtetua se kjo përzgjedhje nuk është bërë me përgjegjësin më të madhe sepse vërtet rezulton se ka pas administrues dhe vëzhgues që nuk kanë qenë në nivelin e detyrës”, tha Mustafa.

Maturantët, të cilët nuk kanë treguar sukses në këtë afat, do të kenë mundësi t’i nënshtrohen testit edhe njëherë. Nehat Mustafa tha se afati i dytë i provimit të maturës do të organizohet më 27 gusht. /RTK/