Lideri i lëvizjes “Vetëvendosje”, Albin Kurti ka zhvilluar një takim të mbyllur për media me përfaqësuesit e Këshillave kundër procesit gjyqësor ndaj tij.

Në konferencën e organizuar pas këtij takimi, Dejona Mihali, anëtare e këtij këshilli, ka thënë se ngjarjet e 12 qershorit kanë qenë në kundërshtim të plotë me vullnetin e 175 mijë qytetarëve, të cilët kanë dhënë nënshkrimet për ndaljen e procesit kundër Kurtit. Ndërkaq, seanca gjyqësore e zhvilluar kundër Albin Kurtit ka qenë gjithçka përveç një seance gjyqësore në një objekt të drejtësisë, vlerësoi ajo. Sipas saj në atë rast janë shkelur të gjitha parimet e mundshme të drejtësisë dhe të një gjyqi të paanshëm dhe të drejtë. Këshillat kanë bërë të ditur se do të vazhdojnë punën dhe ndërkohë kanë dalë me dy propozime: nxjerrjen e përgjegjësve për arrestimin dhe ndërhyrjen e dhunshme në selinë e “Vetëvendosjes”, bërjen publike dhe bartjen e pasojave për ata që zhvilluan një seancë gjyqësore dhe dhënien e një vendimi të padrejtë, në kundërshtim me të gjitha procedurat ligjore, si dhe daljen para drejtësisë të përgjegjësve për vrasjen e dy qytetarëve në demonstratën e 10 shkurtit 2007.