Dubrovnik, 10 korrik – Mbrëmë në Dubrovnik ka filluar Samiti Kroacia 2010, njoftojnë agjencitë kroate të lajmeve. Presidenti dhe kryeministrja e vendit organizues, Kroacisë, kanë thënë me rastin e hapjes se në BE ka vend për të gjitha vendet e Evropës Juglindore.
Në këtë tubim po marrin pjesë burrështetas të rajonit, të Europës dhe të Amerikës Veriore. Ndër pjesëmarrës është edhe kryeministri i Kosovë Hashim Thaçi dhe ministri i Jashtëm, Skender Hyseni. Për shkak të pjesëmarrjes ë këtyre, në Dubrovnik nuk ka udhëtuar delegacioni serb, që duhej të kryesohej nga Boris Tadiq.
“Kroacia dhe Europa Juglindore për nga vlerat i përkasin rrethit të vendeve euro-atlantike dhe është e natyrshme që të ardhmen ta kërkojnë në BE dhe NATO”, ka thënë Jadranka Kosor duke hapur tubimin.
Siç ishte paralajmëruar, temë kryesore e këtij samiti është Evropa Juglindore përballë sfidave globale, me vështrim në integrimin e këtij rajoni në bashkëpunimin e strukturave euro-atlantike.
Edhe presidenti kroat, Ivo Sopiviq ka vlerësuar në fjalën e tij të hapjes se rajoni është në pikën e kthesës dhe se popujt e Europës Juglindore presin pranimin e vendeve të tyre në BE.
“Ata zëra që pëshpëritin se nuk ka vend për të gjithë të rajonit, shuajnë atyë shpresë dhe pengojnë forcat që angazhohen për BE”, citon agjencia Hina Josipoviqin.
Ai ka theksuar se BE dhe ky tubim duhet të dërgojnë mesazh të qartë se në BE ka vend për të gjithë të Evropën Juglindore.
Kryeministri i Francës, François Fillon, pohoi se në BE ka vend për të gjitha vendet e Ballkanit Perëndimor, duke shtuar se afrimi i këtij rajoni BE-së do të jetë më i shpejtë nëse punohet për bashkëpunimin rajonal.
Por, kryeministri slloven, Borut Pohor tërhoqi vërejtjen se ka rrezik se pas pranimit të Kroacisë, zgjerimi i BE-së në rajon të ndalet për një kohë. Ai i bëri thirrje Brukselit që ta shtrojë në rend të ditës çështjen e Ballkanit dhe të diskutojë se si dot vazhdojë zgjerimin e BE-së.
Në konferencën ndërkombëtare në Dubrovnik, Samitin Kroacia 2010, po marrin pjesë kryeministrat e Polonisë, të Bullgarisë, të Shqipërisë, të Malit të Zi e të Kosovës – Donald Tusk, Bojko Borisov, Sali Berisha, Milo Gjukanoviq dhe Hashim Thaçi. Marrin pjesë po ashtu edhe funksionarë të lartë të NATO-s, BE-së dhe të organizatave të tjera ndërkombëtare.
