Hagë, 22 korrik 2010 - Gjykata Ndërkombëtare e Drejtësisë në Hagë, sot në orën 15 do të shpallë mendimin rreth pavarësisë së Kosovës, të kontestuar nga Serbia. Gjykata Ndërkombëtare e Drejtësisë përfaqëson instancën gjyqësore të nivelit më të lartë të Kombeve të Bashkuara. Sot ajo publikon opinionin këshilldhënës për ligjshmërinë e shpalljes së pavarësisë së Kosovës në vitin 2008. Rasti u dërgua në Gjykatë përmes Asamblesë së Përgjithshme të Kombeve të Bashkuara, e cila me shumicë votash mbështeti kërkesën e Serbisë.

Njohës të punës së kësaj gjykate kanë thënë se ajo do të lexojë vetëm pjesë karakteristike të vendimit, që kanë të bëjnë me opinionin e vetë gjykatës dhe se koha e leximit të atyre pjesëve do të zgjasë një orë e gjysmë deri dy. Vendimi pastaj do t’i dërgohet Asamblesë së Përgjithshme të Kombeve të Bashkuara. Po ashtu nuk ka asnjë instancë tjetër ankimore.
Opinioni i GJND-së nuk është i detyrueshëm. Ka vetëm fuqi këshilluese, por ekspertët besojnë se mund të ndikojë në masë të konsiderueshme në rajon dhe në situata të ngjashme në botë.
Dhjetorin e kaluar Gjykata dëgjoi argumentet e përfaqësuesve të rreth 30 shteteve. Vende si Kina, Rusia e Spanja e kundërshtuan shpalljen e pavarësisë së Kosovës edhe para GJND-së. Nga ana tjetër Shtetet e Bashkuara të Amerikës ishin në krye të vendeve që mbështetën pavarësinë e Kosovës, bashkë me shumë vende të Bashkimit Evropian, por dhe vende të dala nga zhbërja e ish-Jugosllavisë, si Sllovenia e Kroacia mbështetën shtetin e Kosovës para drejtësisë ndërkombëtare.
Në seancën e sotme në Hagë kanë rezervuar vendet për pjesëmarrje përfaqësues të më shumë se 40 vendeve nga i gjithë lëmshi tokësor, që dëshmon për interesimin dhe rëndësinë që i kushtohet vendimit të GJND-së për rastin e Kosovës. Pritet që të mbushen të 160 vendet që ka kjo gjykatë. Do të jetë i pranishëm edhe ministri i Jashtëm i Kosovës, Skënder Hyseni, i cili ka shprehur optimizmin për një vendim në favro të Kosovës, që në fakt është vendim në favor të të drejtave njerëzore. Aty do të jetë edhe homologu i tij serb Vuk Jeremiq. Ky i fundit ka deklaruar në prag të vendimit të sotëm se qëndrimi i Serbisë ndaj Kosovës nuk do të ndryshojë. Jeremiq ka theksuar se Beogradi do ta çojë çështjen në vjeshtën e ardhshme në Asamblenë e Përgjithshme të OKB-së.
Udhëheqësit më të lartë të Kosovës dhe ekspertët kosovarë të së drejtës ndërkombëtare vlerësojnë se pavarësia është e pakthyeshme, pavarësisht vendimit të GJND-së. Ky mendim është formuluar dhe nga drejtues të lartë të SHBA-ve dhe ekspertë ndërkombëtarë.