Edhe pas 11 vjet të përfundimit të luftës, Klina vazhdon të mbetet komuna e vetme në Kosovë që nuk e ka të zgjidhur problemin e lokacionit të autobusëve.

Autobusët të cilat qarkullojnë nga komunat tjera nëpër Klinë, hyjnë e dalin sikur në “bahçe të babës”, pa paguar asnjë metelik. Në anën tjetër qytetarët ë Klinës, në veçanti nxënësit, ende nuk dinë se ku të presin për autobus.

Dy stacione që ishin më parë në këtë komunë, tash nuk ekzistojnë. Njëra është shndërruar në stacion të policisë, ndërsa në lokacionin tjetër është ndërtuar objekti për banim social, ku kanë përfituar 23 familje banesa.

Elmi Gashi, përgjegjës i njësisë së “Kosovatransit”në Klinë, ka kritikuar ashpër pushtetarët e kësaj komune, që sipas tij edhe pas 10 vjetësh nuk është gjetur një zgjidhje për këtë problem.

“Kemi biseduar disa herë edhe tash me këtë pushet, edhe me pushtetet e kaluara, për zgjidhjen e këtij problemi, mirëpo nuk kemi mundur të biem në ujdi për një gjë të tillë. Ne jemi duke kërkuar që tregu i perimeve të shndërrohet në stacion të autobusëve, pasi që i plotëson të gjitha kushte, mirëpo pushtetarët nuk pranojnë kërkesat”, shprehet Gashi.

Sipas tij, lokacionet e caktuara nuk i plotësojnë kushtet, pasi që janë shumë larg shkollave dhe qendrës së qytetit. Përkundër kësaj, qeveria komunale e Klinës ka futur në listën prioritare zgjidhjen e këtij problemi.

Zeqir Morina, drejtor i Drejtorisë së Urbanizmit, thotë se prej 38 projekteve të miratuara edhe nga Asambleja komunale është planifikuar që në vitin 2011 të ndërtohet edhe stacioni i autobusëve, vlera e të cilit kap shumën e 50 mijë eurosh.

Ai shpreson se lokacioni i propozuar do të jetë i pranueshëm edhe nga punonjësit e “Kosovatransit”, kurse lokacioni i propozuar i përgjigjet standardeve, sepse është afër stacionit të trenit. Megjithatë për punonjësit e “Kosovatransit”, një gjë e tillë është papranueshme pasi paraqet rrezik qarkullimi mbi binarët e trenit, që mund të sjellë edhe pasoja në komunikacion.