Kryeministri Hashim Thaçi ka thënë se dorëheqja e Fatmir Sejdiut nga posti i Presidentit të Republikës nuk ka pasur reflektime negative në punën e institucioneve të vendit, pasi ato janë duke funksionuar mirë.

Shefi i ekzekutivit bëri këto deklarata të hënën pas ceremonisë së hapjes së “Javës së Biznesit Kosovar”, me ç’rast u ka ikur pyetjeve tjera që kanë të bëjnë me koalicionin qeverisës dhe mundësisë për të shkuar në zgjedhje të parakohshme.

Për kryeministrin Hashim Thaçi edhe pas dorëheqjes së Fatmir Sejdiut nga posti i Presidentit, institucionet e vendet janë duke funksionuar si duhet dhe do të vazhdojnë punën e tyre sipas rregullave dhe ligjeve në fuqi.

Thaçi: Institucionet janë shumë stabile
(Video)
“Unë e kam theksuar edhe më herët dhe ritheksoj edhe sot se pas vendimit të Gjykatës Kushtetuese në rastin e presidentit, është një situatë e re, në një situatë në të cilën institucionet janë duke funksionuar në mënyrë shumë stabile, efektive dhe efikase, dhe gjithçka edhe në hapat e ardhshëm do të jetë në përputhshmëri me procedurat e rregullta me ligjet e Kosovës, Kushtetutën e Republikës së Kosovës dhe dokumentin e presidentit Ahtisari”, ka thënë ai.

Mirëpo Thaçi nuk ka dashur të përgjigjet në pyetjet tjera të gazetarëve që kanë të bëjnë me koalicionin qeverisës dhe mundësisë për të shkuar në zgjedhje të parakohshme.

Ndryshe, Fatmir Sejdiu ka dhënë një javë më parë dorëheqje nga posti i të parit të shtetit pas vendimit të Gjykatës Kushtetuese se ai po e shkelë Kushtetutën e Kosovës me mbajtjen e dy posteve njëkohësisht, atë të presidentit të vendit dhe të kryetarit të Lidhjes Demokratike të Kosovës (LDK).

Gjykata Kushtetuese e Kosovës ditën e premte ka shpallur vendimin për rastin e presidentit Sejdiu të deponuar si kërkesë nga 31 deputetë të Kuvendit të Kosovës./A.Bekteshi/