Sonte në orën 20:30 në stadiumin kombëtar “Qemal Stafa” në Tiranë, do të zhvillohet derbi ballkanik në Grupin D për kualifikimet e Kampionatit evropian 2012, ndërmjet Shqipërisë dhe Bosnjë e Hercegovinës. ...
Për të dyja skuadrat kjo sfidë do të jetë përcaktuese për fatin e mëtejshëm në këto kualifikime. Kuqezinjtë pas dy ndeshjeve të zhvilluara kryesojnë në këtë grup, me 4 pikë, pas barazimit 1:1 në Rumani dhe fitores 1:0 në Tiranë ndaj Luksemburgut. Në anën tjetër boshnjakët kanë shënuar fitore ndaj Luksemburgut, 3:0 dhe kanë pësuar humbje në shtëpi ndaj Francës, 0:2. Bosnjë e Hercegovina ka lojtarë mjaft cilësor, sidomos në fazën sulmuese, ku pa dyshim ylli i skuadrës është Edin Xheko. Përzgjedhësi boshnjak, Safet Sushiq ka paralajmëruar se skuadra e tij do të luajë për fitore, mirëpo edhe kuqezinjtë përkundër faktit se janë të hendikepuar me mungesën e përzgjedhësit Josip Kuzhe (i shtrirë në spital) dhe mbrojtësit Debatik Curri (i lënduar) janë zotuar se do të japin maksimumin për ta vazhduar serinë pa humbje në shtatë ndeshjet e fundit. Ndonëse boshnjakët realisht kanë më shumë kualitete si skuadër, kuqezinjtë besojnë në rezultat pozitiv, duke pasur parasysh përkrahjen e madhe që gëzojnë nga tifozët, që llogariten si ‘lojtari i 12-të’ i kombëtares. Emocionet e ndeshjes Shqipëri-Bosnje e Hercegovinë dashamirët e futbollit do të mund t’i përjetojnë nëpërmjet transmetimit të drejtpërdrejt televiziv në RTK, derisa për ata që nuk do të mund të jenë pranë ekraneve televizive është përkujdesur Radio Kosova, e cila po ashtu do të bëjë transmetimin e drejtëpërdrejt nga Tirana në valët e saj.
