Prishtinë, 8 tetor - Ushtruesi i detyrës së presidentit të Kosovës, Jakup Krasniqi ka shprehur bindjen se pas dorëzimit të Raportit të progresit për Kosovën, në nëntor të këtij viti, rruga e liberalizimit të vizave për qytetarët e Kosovës do të jetë më e konkretizuar. Ai i bëri këto komente pas takimit me ambasadorin e Shqipërisë në NATO, Artur Kuko, me ç'rast ka shprehur vlerësimet më të larta për Parlamentin Evropian për vendimin e liberalizimit të vizave për Shqipërinë dhe Bosnjën.
Krasniqi ka thënë se kjo është një ngjarje e madhe edhe për Kosovën dhe se edhe qytetarët e saj duhet të bëhen pjesë e qytetarëve të vendeve tjera të Evropës dhe Ballkanit, që të udhëtojnë lirshëm pa viza.
"Presim që pas Raportit të progresit, që do të dalë në fillim të nëntorit të këtij viti, realisht të jetë më e konkretizuar rruga e liberalizimit të vizave për qytetarët e Kosovës", ka thënë Krasniqi.
Ndërkohë, ai nuk ka konsideruar se Kosova gjendet në situatë të jashtëzakonshme, që do të çonte deri atje sa ai si u.d. i presidentit të vendit të shpërbënte Kuvendin dhe të shpallte zgjedhje të parakohshme.
Ai ka thënë se një gjë të tillë ka të drejtë ta bëjë, mirëpo, sipas tij, aktualisht nuk ka gjendje të jashtëzakonshme në Kosovë.
"Ne kemi të drejtë kur krijohen situata të jashtëzakonshme. Në Kosovë nuk kemi situatë të jashtëzakonshme. Kemi një situatë që e parasheh Kushtetuta dhe unë detyrat e mia dhe obligimet e mia do të përpiqem t'i kryej mbi bazën e Kushtetutës", citon Kosovapress Krasniqin.
Kreu i shtetit e ka njoftuar ambasadorin e Shqipërisë në NATO për zhvillimet e fundit në Kosovë dhe për ngritjen e institucioneve shtetërore, veçmas Policisë së Kosovës dhe Forcës së Sigurisë së Kosovës.
Ambasadori i Shqipërisë në NATO, Artur Kuko, ka theksuar se nga Brukseli ndiqet me vëmendja ngritja progresive dhe konsolidimi i institucioneve të Kosovës, veçanërisht e këtyre dy shtyllave kryesore të sigurisë në shtetin e pavarur të Kosovës.
Sa i përket veprimeve të fundit të KFOR-it, EULEX-it dhe Policisë së Kosovës në veri të vendit, ambasadori Kuko ka thënë se e gjithë vëmendja e faktorëve ndërkombëtarë në Bruksel është e përqendruar në veriun e Kosovës.
"Është një situatë që ndiqet me fokus të veçantë në selinë e NATO-s. Është një situatë aspak e këndshme. Të gjithë vëzhguesit ndërkombëtarë, qofshin të Aleancës apo të BE-së, fokusohen në veri të Kosovës, si një situatë problematike, e cila duhet adresuar në mënyrë të koordinuar nga autoritetet e Kosovës në bashkëpunim me komunitetin ndërkombëtar. Veçanërisht KFOR-i ka një rol të rëndësishëm në këtë drejtim", është shprehur Kuko.
Ambasadori i Shqipërisë në Asamblenë Parlamentare të NATO-s po qëndron për vizitë në Kosovë, siç ka thënë ai, për vizitë pune, që nuk ka të bëjë me zhvillimet e brendshme politike të Kosovës. Ai do të ketë takime edhe me përfaqësues të tjerë të institucioneve të Kosovës.