Prishtinë, 12 tetor - Presidenti në detyrë i Kosovës, Jakup Krasniqi, ka kërkuar përfshirjen e SHBA-së në bisedimet e paralajmëruara ndërmjet Prishtinës dhe Beogradit. Një ditë para vizitës së sekretares amerikane të Shtetit në Kosovë, Hillary Clinton, i pari i vendit ka thënë se SHBA kanë demonstruar sukses gjatë tërë kohës në angazhimet në Ballkan. Pas mbledhjes së Kryesisë së Kuvendit, Krasniqi, ka thënë se ende nuk është marrë vendimi për datën e zgjedhjeve dhe se konsultimet po vazhdojnë.
Në seancën e radhës të Kuvendit është propozuar që të futet në rendin e ditës edhe votimi i Strategjisë së privatizimit të PTK-së, që është kundërshtuar nga LDK-ja. Shefi i grupit parlamentar, Ismet Beqiri, ka thënë se qëndrimi për mosvotimin e kësaj strategjie është i pandryshuar dhe nuk duhet të shkohet me privatizimin para zgjedhjeve të përkohshme. Ai ka thënë se LDK-ja nuk mund të shantazhohet.