Prishtinë, 21 tetor - Lëvizja FOL ka shprehur sot shqetësimin e saj në lidhje me zhvillimet e fundit politike në vend. Sipas kësaj organizate, ato kanë prodhuar një krizë institucionale, që do të dëmtojë proceset e shtetndërtimit dhe qeverisjen e mirë.
“Në këtë kuptim, zhvillimet e fundit e kanë zhvendosur vëmendjen nga lufta kundër korrupsionit dhe krimit të organizuar, duke u marrë me krizën e krijuar nga vetë politikanët në pushtet. Thirrja e lëvizjes FOL për më shumë vëmendje në këtë drejtim, nuk nënkupton që kriza të mos tejkalohet, por assesi nuk bën të shndërrohen në një alibi”, ka thënë drejtori ekzekutiv i FOL, Ramadan Ilazi. Sipas tij, planet e veprimit nga Prokuroria Speciale si dhe EULEX-i për ndjekjen e zyrtarëve dhe individëve të përfshirë në afera korrupsioni dhe krim të organizuar nuk duhet të shndërrohen ne letër pa vlerë. Ilazi ka folur edhe për çështjen e financimit të partive politike në Kosovë, duke shprehur shqetësim në lidhje me mungesën e transparencës së burimeve të financimit të fushatave të tyre zgjedhore.