Beograd, 21 tetor – Serbia nuk është në pozitë të njoh Kosovën, prandaj tash e një kohë kemi kërkuar mënyrë sesi ta lëmë anash këtë çështje dhe të përqendrohemi në çështje të tjera, sidomos procesin e integrimit në BE, ka deklaruar ambasadori i Britanisë së Madhe në Serbi, Stephen Wordsworth, në një intervistë për botimin e sotshëm të gazetës “Vreme” të Beogradit.
Në këtë kontekst, Wordsworth ka shfaqur shpresën se aplikimi i Serbisë së shejti do t’i procedohet Komisionit Evropian.
“Hapi tjetër është që paraqitja e Serbisë për statusin e kandidatit për anëtarësim t’i procedohet Komisionit Evropian. Britania e Madhe shpreson se kjo do të ndodhë nga fundi i këtij muaji”, citon “Vreme” Wordsworthin. Ai ka pohuar se Britania po mbështetë fuqishëm hyrjen e Serbisë në BE dhe se ky proces pas marrëveshjes ndërmjet Serbisë e BE-së rreth propozimit të Rezolutës për Kosovën në Asamblenë e Përgjithshme të KB po ec në drejtim pozitiv.
“E ardhmja e Serbisë, ‘ashtu si e ardhmja e Kosovës në një kohë të konsiderueshme, është në Bashkimin Evropian. Por nuk është në interesin e askujt që Ballkanin perëndimor të ketë far vrimash’. Kjo gjithsesi nuk është as në interesin e serbëve që jetojnë në Kosovë”, ka shtuar ai
Ambasadori britanik në Beograd ka thënë se procesi i hyrjes së gjithë rajonit, duke përfshirë Serbinë e Kosovën në BE do të jetë i ndërlikuar, prandaj është shumë e rëndësishme që të gjitha palët që janë të përfshira të kenë besim në njëra tjetrën, në mënyrë që me përpjekje të përbashkëta të arrijnë qëllimin.
Sipas fjalëve të tij, kur Serbia të marrë statusin e kandidatit, do të fillojë procesi i negociatave të hollësishme rreth 35 kapitujve, që marrin një kohë, e qëllimi i të cilave është ta sjellin Serbinë në standardet e harmonizuara me BE-në.
Wordsworth ka thënë se në këtë rrugë është i domosdoshëm realizimi i bashkëpunimit rajonal, duke theksuar marrëdhëniet me Kroacinë si të përmirësuara në saje të përpjekjeve të dy palëve.
Ai ka shtuar se Serbia mund të ketë ndikim pozitiv në situatën në BeH, dhe ka shfaqur shpresën se do të bëhen përparime në dialogun ndërmjet Beogradit e Prishtinës.
