Skenderaj, 26 tetor – Ajnishahe Shala-Halimi, kryetare e Iniciativës Qytetare (IQ) për largimin Kastriot Dukës nga xhamia e Marinës, është kërcënuar, ofenduar e sulmuar në vazhdimësi nga ky i fundit dhe përkrahësit e tij. Këtë e ka pohuar vetë Shala-Halimi në një konferencë për media, të hënën, ku ka sqaruar se ka pasur gjithsej 3 sulme, në dy prej të cilave është sulmuar nga përkrahësit e Dukës, kurse herën e fundit nga vetë ai.
Ajo i ka thënë “Kohës Ditore” se të premten, më 22 tetor, Kastriot Duka me 7-8 njerëz tjerë, ka qëndruar për mbi një orë në lokalet dhe trotuarin përballë zyrave të qendrës të cilën e udhëheq, qendra e gruas “Prehja”, kur ajo është nisur me veturë për të dalë në terren, është sulmuar nga Duka dhe njerëzit e tij.
“Unë u nisa me veturë për të shkuar në terren dhe për një moment e kam vërejtur se xhipi i cili vinte në drejtim tim, në të cilin ishte Duka me disa njerëz, ka lëshuar shiritin e vet dhe ka kaluar në shiritin tim. Për t’i ikur ndeshjes ballore unë kam ikur në anën e djathtë duke kaluar në trotuar”, ka shpjeguar ajo momentin kritik. Sipas saj, derisa Duka me njerëz ka ndenjur në lokalin përballë, një njeri i panjohur, i cili është prezantuar rrejshëm dhe ka shpikur arsyen pse e ka kërkuar, ka shkuar në zyrat e Qendrës dhe e ka vërtetuar se a është ajo aty, prandaj e kanë pritur aq gjatë derisa ajo ka dalë nga zyra dhe është nisur me veturë.
Kryetarja e IQ-së pastaj ka treguar se pasi iu ka shmangur “aksidentit”, pas një qetësimi disa minutash, e ka thirrur policinë për ta lajmëruar rastin. “Posa e ka parë numrin tim në telefon, polici më ka thënë se ‘e dimë pse na ke thirrur, e dimë se Duka është këtu sot’, e mandej unë e kam informuar edhe për sulmin ndaj meje, kurse zyrtarisht rastin në polici e kam hapur sot (e hënë)”, ka treguar ajo.
Ajnishahe Shala-Halimi, ka treguar pastaj se nuk është hera e parë që sulmohet nga njerëzit e njëjtë dhe për arsyeje të njëjta.
Burime nga fshati i kanë treguar gazetës se Kastriot Duka, me bashkëpunëtorë, prej të cilëve 5-6 nga bota e jashtme (vendet e Lindjes) dhe me veshje myslimane (fustanella e kapela të ndryshme), kanë qëndruar edhe të dielën në Marinë.