Beograd, 26 tetor – Kryetari i Partisë Demokrate të Serbisë (DSS), Vojisllav Koshtunica, sipas medieve të Beogradit ka deklaruar sot se Bashkimi Evropian bashkë me vendimin teknik për procedimin e kandidaturës, Serbisë ia ka imponuar se duhet të vendos marrëdhënie të mira fqinjësore me Kosovën.

“Në këtë mënyrë iu dha fund propagandës dyvjeçare të pushtetit, sipas të cilës BE dhe Kosova janë dy çështje të ndara”, ka thënë Koshtunica për Press.

Sipas tij, pas nënshkrimit të Marrëveshjes Stabilizim-Asocim, dhe pranimit të EULEX-it, me miratimin e rezolutës në KB fillon faza e tretë e procesit të njohjes shkallë-shkallë të shtetit të Kosovës. Faza e tretë nis me dialogun rreth marrëdhënieve të fqinjësisë së mirë, që dje është konfirmuar me konkluzionin e BE-së.

“Pushteti aktual në vend të partneritetit ka pranuar që me BE-në të vendos marrëdhënie vasale dhe ka lejuar që Brukseli të kushtëzojë Serbinë, duke ia marrë 15 % të territorit është shprehur Koshtunica.