Prishtinë, 4 nëntor - Kryetari i Lidhjes Demokratike të Dardanisë, Nexhat Daci, do të paraqitet sot sërish në Gjykatën e Qarkut në Prishtinë, nën akuzën se ka kryer vepër penale të përvetësimit të tre gjeneratorëve në vlerë rreth 30 mijë euro dhe rregullim të dhëmbëve e blerje të syzeve gjatë kohës sa ishte kryetar i Kuvendit të Kosovës.
Në seancë, prokurorja e rastit, Fikrije Krasniqi, dhe avokatët mbrojtës të Nexhat Dacit e Ahmet Alishanit, Bajram Tmava dhe Flamur Bogaj, sot do të paraqesin fjalët e tyre përfundimtare.
Gjykimi i Dacit e Alishanit nis në orën 13 e 45 minuta, ndërsa vendimi do të shpallet nesër, në orën 10: 00, nga një trup gjykues prej dy gjyqtarësh të EULEX-it dhe një vendësi.
Gjykimi i Dacit po zhvillohet në kohën kur partitë politike kanë intensifikuar fushatën për zgjedhjet e parakohshme të 12 dhjetorit.