Partia Fryma e Re reagon ndaj premtimeve të pabaza të kryeministrit të Kosovës në dorëheqje rreth rritjes së pagave të punonjësve të arsimit. Sipas kësaj partie, ende pa filluar fushata, qeverisja e vjetër e Kosovës ka filluar që me premtime të paqëndrueshme t’i thyejë premtimet paraprake, që i ka bërë para Kuvendit dhe partnerëve ndërkombëtarë. Për më shumë, qeveria në dorëheqje, në kundërshtim me të gjitha parimet demokratike, ende përdor zyrat e qeverisë për të bërë fushatë dhe premtime për politika të vitit 2011, për të cilat nuk e ka mandatin.
Në një deklaratë për media pas një takimi me Sindikatat, Kryeministri në dorëheqje ka premtuar rritje pagash prej 50 përqind për të gjithë punëtoret e arsimit, prej janarit 2011. Përveç faktit që mësuesit dhe arsimtarët kësaj qeverisjeje i kujtohen vetëm në prag të zgjedhjeve, duhet t’i kujtojmë edhe njëherë disa vendime të qeverisë që bien ndesh me këtë premtim.

Në qershor të këtij viti, Kryeministri i vendit në një letër dërguar FMN-së, për ta nënshkruar marrëveshjen me këtë institucion, është zotuar vetë se për shkak të nënshkrimit të kontratës për autostradën, shteti do të jetë në vështirësi fiskale dhe Kosova nuk do të lëvizë nga kornizat e caktuara më herët, posaçërisht sa i përket rritjes së pagave.

“Partia Fryma e Re thërret të gjithë qytetarët që të mos bien pre e premtimeve, të cilat premtojnë rritje të tilla e që më vonë do të jenë të pamundshme... Koha është për ndryshim, prandaj bëjmë edhe njëherë thirrje tek të gjithë qytetarët që në mënyrë masive të dalin në zgjedhjet e 12 dhjetorit, për ta treguar vullnetin e tyre për ndryshim”, thuhet ndër të tjera në reagim

Nuk kemi te beje me Qeveri ne Dorheqje por me Qeveri te shkarkuar, ngase nuk ka fituar votbesimin, pa marre parasyshe rrethanat.