Mitrovicë, 9 dhjetor - “Bashkimi i Mitrovicës, as që ka qenë në agjendë të keq-qeverisjes gjatë këtyre viteve. Partia e jonë do të angazhohet maksimalisht për Mitrovicën, duke ia arritur edhe bashkimin e qytetit”, theksoi Valdete Idrizi, kandidate për deputete e FER-it gjatë bashkëbisedimit të sotëm të aktivistëve të kësaj partie me qytetarët e Mitrovicës.
Shpend Ahmeti, bashkëthemelues i Frymës së Re, kritikoi qeverinë se e kanë çuar vendin në listën e vendeve më të korruptuara në botë.
“Sot, në Ditën Ndërkombëtare Kundër Korrupsionit, jemi një ndër vendet më të korruptuara në botë, kurse politika e vjetër në përgjithësi nuk është në gjendje ta luftojë korrupsionin, e sidomos keq-qeverisja, lufta e së cilës kundër korrupsionit nënkupton luftë kundër vetvetes”, tha Shpend Ahmeti.
Bartësi i listës, Ilir Deda, theksoi se Fryma e Re do të krijojë raporte të mira fqinjësore me të gjitha vendet fqinje si shtet i pavarur dhe jo përmes UNMIK-ut e as EULEX-it.
FER-ia ka vazhduar rrugëtimin e saj edhe në Vushtrri, ku qeverinë në largim Ilir Deda e ka quajtur përgjegjëse për dështimin e privatizimit.
“Vushtrria ka potencial të madh ekonomik, por për shkak të politikës së vjetër sot gjendet në një pozitë shumë të keqe. Privatizimi ka dështuar në Vushtrri për shkak të politikës së vjetër dhe për shkak të mungesës së interesimit të politikës së vjetër për me pas një privatizim dhe një zhvillim të suksesshëm”, ka thënë Deda, duke shtuar se me Frymën e Re kjo do të përfundojë dhe se do të rishikohet procesi.
Ai e ka quajtur klasën politike që udhëhoqi qeverinë përgjegjëse për kriminalizimin e vendit.