Prishtinë, 10 dhjetor - EULEX-i do të vazhdojë ta mbështesë gjyqësorin dhe Policinë e Kosovës në mënyrë që të sigurojë mbrojtje maksimale për viktimat e krimit dhe ndjekje efikase penale për autorët e krimeve, deklaroi Shefi i EULEX-it Xavier de Marnhac...
EULEX-i të premten shënon Ditën ndërkombëtare të të drejtave të njeriut dhe kujton miratimin dhe shpalljen e Deklaratës Universale për të Drejtat e Njeriut (DUDNJ) nga ana e Asamblesë së Përgjithshme të Kombeve të Bashkuara.
Në njoftimin e Zyrës së EULEX-it thuhet se edhe pse DUDNJ-ja ka vetëm karakter shpjegues, të drejtat e përcaktuara janë inkorporuar në instrumentet juridike ndërkombëtare, rajonale dhe nacionale dhe janë bërë ligjërisht të obligueshme. Në Kosovë këto dispozita janë pjesë e ligjit në fuqi dhe i obligojnë institucionet e Kosovës që t’i garantojnë këto të drejta themelore për të gjithë qytetarët e saj.
“Shkeljet e të drejtave të njeriut e minojnë strukturën e sundimit të ligjit të secilës shoqëri. Viktimat, të cilave ju shkelen të drejtat njerëzore, kanë nevojë për mbrojtje dhe ndihmë dhe kryesit e shkeljes duhet menjëherë të dalin para drejtësisë”, tha Shefi i EULEX-it Xavier de Marnhac.
Sipas njoftimit, EULEX-i u ndihmon autoriteteve të Kosovës, autoriteteve gjyqësore dhe agjencive për zbatimin e ligjit në përparimin e tyre drejt qëndrueshmërisë dhe llogaridhënies, përfshirë respektimin e ligjit sipas parimeve të DUDNJ. Në këtë kuadër, EULEX-i i monitoron, mentoron dhe këshillon (MMK) institucionet e Kosovës për ta siguruar pajtueshmërinë me ligjin për të drejtat e njeriut dhe merr pjesë në procesin e hartimit të legjislacionit për t’u siguruar që parimet e DUDNJ të përfshihen plotësisht në legjislacionin e ri. Është me rëndësi të theksohet që respektimi i plotë i të drejtave të njeriut është prioriteti kryesor për partneritet evropian.
EULEX-i siguron që të gjitha kompetencat ekzekutive, të cilat rrjedhin nga mandati i tij, i respektojnë standardet ndërkombëtare në lidhje me të drejtat e njeriut dhe që njësia e tij e caktuar, Zyra për të Drejtat e Njeriut dhe Çështje Gjinore, i zbaton këto standarde në veprimet e saj.
