Prishtinë, 10 shtator - Afrimi i së dielës, kur qytetarët kosovarë do të vendosin për udhëheqësit e ardhshëm të institucioneve, nuk po e frikëson KQZ-në. Zyrtarët e mekanizmit që organizon zgjedhjet në Kosovë kanë thënë se janë të gatshëm dhe se i kanë kryer të gjitha përgatitjet për mbarëvajtjen e zgjedhjeve.
“Të gjitha përgatitjet tona kanë përfunduar. Fletëvotimet janë në depon e KQZ-së. Do të shpërndahen në orët e hershme të mëngjesit të shtunën dhe të dielën”, ka thënë kryetarja e KQZ-së, Valdete Daka.
Sipas shefes së komisionit, KQZ-ja sot do të vendosë nëse do të dalë ose jo me rezultate preliminare të zgjedhjeve.
Daka ka thënë se pavarësisht incidentit të fundit, ku është vrarë një punëtor i KQZ-së, përgatitjet për mbajtjen e zgjedhjeve po vazhdojnë edhe në veri të Kosovës.
“Përgatitjet janë bërë, sikur për të gjitha pjesët e Kosovës, ashtu edhe për Mitrovicën. Ne me keqardhje e kemi pranuar lajmin për vrasjen, i ndjeri ka qenë punëtor i KQZ-së, por ne nuk mund ta gjykojmë motivin e vrasjes pa u bërë hetimet”, ka thënë Daka.
Të gatshëm për ditën e zgjedhjeve janë shprehur edhe zyrtarët e qendrës së numërimit të votave. Koordinatori i kësaj qendre ka organizuar një pritje për përfaqësuesit e medieve. Ahmetaj ka thënë se me stafin prej 690 punëtorësh, garanton numërim dhe verifikim të çdo vote.
“Ne evidencojmë të dhënat për secilin vendvotim. Nëse ka mospërputhje, atëherë ato rezultate u dërgohen auditorëve. Ne reagojmë nëse ka shpërputhje të të dhënave deri në limitin e lejuar”, ka thënë Ametaj. Sipas tij, limit i lejuar në shpërputhje të të dhënave në procesverbal me votat që gjendjen në kuti është tre vota më pak ose më shumë.