Prishtinë, 10 dhjetor – Fushata më e shkurtër zgjedhore, e imponuar nga Ligji Zgjedhor dhe Kushtetuta, përmbyllet sot. Në orën 24 fillon heshtja zgjedhore dhe kandidatët e zellshëm të 29 subjekteve të certifikuara për të kërkuar votën e qytetarëve gjatë dhjetë ditëve të shkuara, do të bëjnë një ditë (me natën) pushim, që të dielën të shohin se çfarë kanë mbjellë.
Ato sot mbajnë tubimet e tyre përmbyllëse në disa qendra të Kosovës, shumica në Prishtinë. Ndërkohë, sot vjen edhe ekipi i vëzhguesve të rrjetit të organizatave evropiane për monitorimin e zgjedhjeve. Ndërkaq, qendra e numërimit të votave premton transparencë gjatë procesit të numërimit.
Komisioni Qendror i Zgjedhjeve (KQZ), nëpërmjet një njoftimi sot bëri publike se numri i përgjithshëm i votuesve në Kosovë për zgjedhjet e 12 dhjetorit është 1 milion e 630 mijë e 636 persona. Sipas njoftimit, votues të rinj janë 73. 288 persona, ndërkaq në ditën e zgjedhjeve do të jenë 35. 735 persona që do të mbushin 18 vjeç dhe të cilët kanë mundësi të votojnë.
KQZ njofton po ashtu se 34. 521 votues kanë ndryshuar adresën e vendbanimit, kurse nga lista e votuesve si persona të vdekur janë fshirë 6. 165 veta.