Në fillim të pranverës përfaqësuesit e rrjetit shoqëror online kanë fituar në padinë kundër tre spamerëve të cilët kishin vjedhur llogaritë e përdoruesve dhe kishin publikuar porositë e tyre. Tani gjykata kaliforniane ka sjellë vendimin e vet final.



Gjykata në San Jose i ka përcaktuar njërit prej të dënuarve në proces, Sanford Wallace, i cili është i njohur si “Mbreti i Spamit”, që Facebookut duhet t’i paguaj 711 milionë dollarë.

Kjo është vetëm një në vargun e padive spamerëve të cilën përfaqësuesit e Facebook i kanë fituar, e definitivisht nuk është dëmshpërblimi më i madh të cilin rrjeti online e ka fituar. Në muajin nëntor të vitit të kaluar Facebook nga Adam Guerbueazi dhe kompania “Atlantis Blue Capital” ka fituar dëmshpërblim prej 873 milionë dollarë.

Sa i përket “Mbretit të Spamit”, kjo është padia e dytë e tij e humbur ndaj rrjeteve shoqërore. Vitin e kaluar atij i është përcaktuar dënimi prej 234 milionë dollarësh në proces të cilin kundër tij e kishte ngritur rrjeti MySpace.