[You must be registered and logged in to see this image.]

Liverpuli do të luajë sot ndaj Evertonit në derbin e qytetit.


Rafael Benitez ka bërë të ditur se ai e kupton shumë mirë zhgënjimin e tifozëve të Liverpulit për momentin e vështirë që po kalon aktualisht klubi, ndërsa ka konfirmuar përkushtimin e tij ndaj skuadrës. Të Kuqtë do të zhvillojnë sot derbin me Evertonin, pasi nuk kanë arritur të kualifikohen në fazën e dytë të Champions Ligës dhe me vendin e katërt në kampionat që është në rrezik. Benitez mund të ketë në dispozicion Fernando Torresin për ndeshjen e “Gudison Park”, edhe pse kjo nuk është akoma e sigurtë, për shkak të shqetësimeve fizike, që ka sulmuesi spanjoll. Megjithatë, me ose pa Torresin, Benitez e di se Liverpuli duhet të rikthehet menjëherë tek fitorja me Totenhemin, Aston Vilën dhe Mançester Sitin që janë në luftë për një vend midis katër të parëve në renditje. “Nëse je një tifoz nuk mund të jesh i kënaqur kur skuadra jote nuk fiton,- ka thënë Benitez. - Por unë nuk do të gjej justifikime, ne do të përmirësohemi. Të gjithë në këtë klub janë të zhgënjyer për faktin se nuk po fitojmë. E vetmja mënyrë për ta ndryshuar këtë situatë është duke punuar shumë”. Gjithashtu, spanjolli e ka bërë të qartë se ai nuk ka ndërmend të largohet nga Liverpuli, pavarësisht ofertave të rëndësishme, që ka marrë. “Kjo situatë për mua nuk është një gjë e re. Pasi kam fituar kampionatin në Spanjë, më pas Kupën UEFA dhe këtu Champions Ligën dhe Kupën e Anglisë, kanë ardhur shumë oferta. Sezonin e kaluar kam marrë një ofertë shumë të rëndësishme, por unë kam nënshkruar me Liverpulin dhe nuk jam penduar për këtë. I kam dhënë fjalën time stafit dhe lojtarëve. E dua këtë qytet dhe e dua këtë klub dhe tifozët. Kur kam nënshkruar kontratën time të re kam patur oferta shumë të larta nga klube të tjerë dhe më shumë parà në dispozicion për merkaton. Por kam vendosur të qëndroj, sepse e ndiej se kemi një skuadër të mirë. Do ta vërtetojmë këtë gjatë pjesës tjetër të sezonit. Nuk po luajmë në nivele të larta, por do të përmirësohemi, do të rikthehemi në Europë”, ka thënë Benitez.