Prishtinë, 29 janar – Deputetë të rinj do ta dominojnë përbërjen e re të Kuvendit të Kosovës. Kjo për arsye se vetëm 26 deputetë shqiptarë kanë mundur të ruajnë ulëset nga mandati i shkuar. Të tjerët, që janë 69, në fund të mandatit të legjislaturës së tretë nuk kanë qenë pjesë e Kuvendit, shkruan e përditshmja Koha Ditore në numrin e sotëm.
Bazuar në lista jozyrtare të KQZ-së, në të cilat pasqyrohet numri i votave që ka marrë secili prej kandidatëve për deputet në zgjedhjet e 12 dhjetorit, përfshirë edhe votat e marra gjatë rivotimit, pesë subjektet politike shqiptare do të zënë në Kuvend 95 ulëse, kurse 25 të tjera subjektet e komuniteteve pakicë.
Nëse votat me kusht nuk kanë ndërruar përqindjen preliminare që ka dhënë KQZ-ja sa i takon rezultatit të zgjedhjeve të 12 dhjetorit, atëherë në legjislaturën e katërt PDK-ja do të ketë 35 deputetë, LDK-ja 26, lëvizja “Vetëvendosje” 14, AAK-ja 12 dhe AKR-ja 8.
Ndarja e tillë është bërë nga rezultati preliminar i përqindjes së votave që kanë marrë subjektet politike. Pas rivotimit, rezultatet preliminare tregojnë se PDK-ja ka 32,4 për qind të votave, LDK-ja 24,67 për qind, lëvizja “Vetëvendosje” 12,55 për qind, AAK-ja 11,09 për qind dhe AKR-ja 7,22 për qind.
Nga subjektet e partive të komuniteteve pakicë, më së shumti ulëse në Kuvend do të zërë SLS-ja. Gjithsej do të ketë 9 deputetë, prej tyre 7 nga kuota e vendeve të rezervuara. Pastaj, JSL-ja 4 ulëse, vetëm 1 prej tyre nga votat, KDTP-ja 3 ulëse, po kështu vetëm 1 nga kuota për komunitetet pakicë, dhe koalicioni VAKAT 2 ulëse, 1 prej tyre nëpërmjet të njëjës kuotë. Subjekte të tjera të pakicave që do të përfitojnë vetëm nga ulëset e garantuara janë: PDAK-ja 2 sosh, kurse nga një ulëse do të kenë NDS-ja, IRDK-ja, GIG-u, BSDAK-ja dhe PREBK-ja.
Gazeta nuk ka mundur të sigurojë emrat e kandidatëve për deputetë të partive nga komunitetet që kanë marrë vota për të qenë pjesë e legjislaturës së ardhshme. Ndërkaq të pesë partive shqiptare po.
Krahasuar me mandatin e kaluar, PDK-ja do të ketë një deputet më shumë. Në përbërjen e re do të jenë vetëm 11 deputetë që ishin pjesë e Kuvendit deri në shpërndarjen e mandatit të legjislaturës së tretë. Më shumë për emrat e deputetëve të vjetër e të rinj që do të zënë ulëset në përbërjen e ardhshme të parlamentit lexoni në numrin e sotëm të gazetës.
