Stokholm – Një burrë suedez i ka shpëtuar akuzës për vrasjen e bashkëshortes pasi hetuesit kanë zbuluar se ajo u vra nga dreri.
Ngjarja ka ndodhur në pjesën më veriore të vendit nordik më 5 shtator të vitit 2008, kur Agnesa Westlund doli bashkë me qenin e saj për të bërë një shëtitje në pyll. Ajo u vonua dhe burri i shqetësuar doli ta kërkonte por e gjeti pa jetë. Ingemar u akuzua për vrasjen e së shoqes dhe u burgos për rreth 5 muaj në Loftahammar, pasi policia e kishte në krye të listës së të dyshuarve.
Në mungesë të provave ai u lirua, por hijet e dyshimit vazhdonin të binin mbi të. Gjatë një kontrolli më të detajuar që iu bë xhupit të viktimës, doli se qimet nuk ishin të qenit, por të një dreri.
“Ishte një proces i keq gjyqësor. Pas një ankthi që zgjati më shumë se një vit, hetuesit as nuk më lajmëruan. E mora vesh nga gazetat të vërtetën”, u shpreh i akuzuari. Me pak fjalë, ndryshimin u bë për një qime, sepse po të mos gjendej kjo provë, burri mund ta kishte kaluar jetën pas hekurave për një krim që nuk e kishte kryer asnjëherë.