Londër - Janë gabuar ata të cilët kanë menduar se epoka e spiunëve me pagesë ka marrë fund njëherë e përgjithmonë.
Nga sot e tutje, në Britaninë e Madhe nëse spiunon komshiun paguhesh 500 funte. Nëpërmjet një skeme të veçantë, qeveria britanike ka nisur aplikimin e një projekti për të inkurajuar qytetarët në dhënien e informacionit për fqinjët e tyre të cilët banesat e dhëna nga bashkia i lëshojnë me qira.
Në dispozicion të qytetarëve të cilët do të spiunojnë janë vënë disa numra telefoni, një adresë e-mail përfshi një faqe në internet. Hartuesit e këtij projekti thonë se shpërblimi prej 500 funtesh do të nxisë qytetarët të japin informacion në bashkitë e tyre. Sipas një studimi, janë 50 000 banesa të dhëna në shfrytëzim nga baskitë, që pastaj janë lëshuar me qira, në kundërshtim me ligjin.
Në dispozicion të kësaj skeme, qeveria e kryeministrit Gordon Brown ka miratuar një fond prej 4 milionë funtesh. Nëpërmjet një fushate sensibilizimi për këtë skemë qytetarëve u kërkohet të raportojnë edhe për çështje të tjera, si hapja e shtëpive publike ilegale, emigrantët ilegalë apo të sjelljeve antisociale.
Kritikët e kësaj skeme thonë se qeveria është duke legjitimuar spiunimin e pakontrolluar, duke krijuar kështu një armatë të tërë spiunësh me pagesë. Por, hartuesit e kësaj nisme kanë pohuar se bashkive i është kërkuar të jenë vigjilente ndaj atyre të cilët mund ta përdorin këtë mundësi spiunimi për t’u hakmarrë ndaj fqinjëve të tyre për inate personale.