Të ndihmosh gruan të lindë? Nuk është ndonjë përgjegjësi e madhe, të paktën këtë mund ta thotë me siguri shtetasi britanik Leroy Smith.
Në mënyrë të papritur bashkëshortes së tij Emma i filluan dhimbjet e lindjes, por ai nuk u zhyt në panik, pasi nëpërmjet telefonit Blackberry është futur në Google ku ka kërkuar me fjalinë “si të lindësh një fëmijë”. Duke ndjekur instruksionet e enciklopedisë Wikipedia nga ekrani i vogël i telefonit, arriti të nxjerrë në dritë vajzën e tij të vogël në shëndet të plotë.
“5 minuta pas lindjes erdhi ambulanca që nuk arriti dot në kohë në shtëpinë në lindje të Londrës”, shkruan tabloidi “The Sun”. Ai rrëfen se në momentin që Emma pati dhimbje të forta, nuk dinte cfarë të bënte.
“Kështu u mbështeta në informacionet e internetit duke përdorur telefonin Blackberry. Nuk më ka shkuar asnjëherë në mendje një gjë e tillë. Në instruksione thuhej: Kur të shikosh kokën, mbaje. Dhe kur fëmija të dilte, duhej t’ia jepja Emma-s dhe t’i mbuloja të dy me një batanije. Gjithçka zgjati rreth 40 minuta”, thekson bashkëshorti hero.