[You must be registered and logged in to see this image.]

SHBA, ofertë për të gjallëruar negociatat në Kopenhagë


Shtetet e Bashkuara kanë premtuar të ndihmojnë për të krijuar një fond vjetor prej 100 miliardë dollarësh për vendet e varfra për të luftuar ndryshimet klimatike. Ky hap mendohet se mund të ndihmojë për t’i gjallëruar bisedimet e ngecura në konferencën e Kopenhagës për klimën.
Në përpjekje për të zhbllokuar negociatat, sekretarja e Shtetit Hillary Clinton njoftoi të enjten ofertën amerikane, ndërkohë që dhjetëra udhëheqës botërorë filluan të mbërrijnë në kryeqytetin danez për takimin e nivelit të lartë nesër.

Clinton tha se mbështetja amerikane kushtëzohet nga marrëveshjet e vendeve në zhvillim për të ulur nivelin e gazit karbonik dhe për të gjetur mënyra për verifikimin e kësaj uljeje. Ajo paralajmëroi gjithashtu se Washingtoni do ta tërheqë ofertën nëse Kina dhe ekonomi të tjera në zhvillim nuk pranojnë masat ndërkombëtare të verifikimit.

Disa delegatë nga Kina thanë se Pekini e vë në pikëpyetje arritjen e një marrëveshje të shpejtë që të zëvendësojë Traktatin e Kiotos, i cili skadon në vitin 2012. /VoA/