[You must be registered and logged in to see this image.]

Berisha: Të vendosur për mbrojtjen e mjedisit

Kryeministri Sali Berisha po merr pjesë në konferencën e OKB për ndryshimet e klimës që po mbahet në Kopenhagën në Danimarkë. Në një fjalim të mbajtur në seancën e paradites, kreu i qeverisë shqiptare tha se Shqipëria është e gatshme të japë kontributin e saj në zgjidhjen e çështjeve që kanë të bëjnë me ndryshimet klimaterike.
“Objektivi i Qeverisë shqiptare është që të bëhet një prodhues i rëndësishëm i energjisë së pastër në rajon. Aktualisht rreth 95% e energjisë që konsumohet prodhohet nga burimet hidrike. Potencialet e prodhimit janë 3 herë më të mëdha. Shpresojmë të ndërtojmë 440 hidrocentrale me fuqi totale 20 miliardë kilovat/orë. Gjatë 3 viteve të fundit është firmosur për rreth 130 hidrocentrale. Kompani serioze nga Evropa punojnë për ndërtimin e tyre”, ka thënë Berisha.

Natyrisht, vijoi ai, “kriza financiare ka vështirësuar kapitalet e investimit të tyre dhe unë ftoj institucionet e huaja financiare të mbështesin këto kompani në mënyrë që ato të vazhdojnë investimet dhe kjo do të jetë me fitim jo vetëm për Shqipërinë, por edhe për rajonin”.

“Shqipëria ka licencuar deri tani 2 mijë megavat parqe eulike, mijëra të tjerë janë në studim e sipër. Jemi të vendosur për të mbrojtur mjedisin dhe për t’i dhënë përparësi industrisë së gjelbër. Unë shpresoj që ky samit do të gjejë zgjidhjen për çështjet që do të diskutohen”, tha Berisha.

Gjithashtu Berisha do të zhvillojë një seri takimesh bilaterale me liderë të rajonit dhe evropianë. /alsat/