Dy kryeministrat kanë diskutuar edhe për njohjen e pavarësisë së Kosovës nga Kuvajti

[You must be registered and logged in to see this image.]
Kryeministri Sali Berisha eshtë takuar me kryeministrin e Kuvajtit, Lartësinë e tij Sheikh Nasser Mohammed Al Ahmed Al Sabah. Dy homologët kanë vlerësuar nivelin shumë të mirë të marrëdhënieve ekonomike midis dy vendeve, por janë shprehur se ekzistojnë të gjitha potencialet për një zhvillim të mëtejshëm të këtyre marrëdhënieve, duke e çuar bashkëpunimin ekonomik në nivele edhe më të larta. Për bashkëpunimin në fushën e infrastrukturës, kryeministri Berisha u ndal në projektet e financuara nga qeveria Kuvajtiane, më konkretisht në projektin për ndërtimin e Boshtit të Jugut.
"Shqipëria është e hapur që të lehtësojë investimet kuvajtiane në Shqipëri në fushën e rafinerive dhe përpunimit të naftës, si dhe në ndërtimin e Hidrocentraleve", ka thënë Berisha, ndërsa pala kuvajtiane ka shprehur interes edhe për projekte të ndryshme në fushën e bujqësisë. Dy kryeministrat kanë diskutuar gjatë këtij takimi edhe për njohjen e pavarësisë së Kosovës nga Kuvajti.