Veprat që janë si hiri
--------------------------------------------------------------------------------
"Shembulli i veprave të atyre që nuk besuan është si hiri, të cilin me puhi e shkapërderdh era në ndonjë ditë të stuhishme, e ata nuk mund të realizojnë asgjë nga veprat që kanë bërë, e ky është ai dështimi i madh" . (Kur'an, 14:18)
All-llahu i ka përngjasuar veprat e jobesimtarëve si shembullin e hirit në të cilin një goditje e rëndë e erës e fryn gjatë një dite të stuhishme, duke treguar kotësinë dhe mungesën e dobisë së atyre veprave.
Pra Ai i krahason veprimet e tyre të pavlefshme me pluhurin e shpërndarë sepse veprimet nuk janë bazuar në themelet e Imanit (besimit) dhe Ihsanit. Ato nuk ishin as për hir të All-llahut, e as sipas urdhrit të Tij. Pra, një person i tillë nuk do të jetë në gjendje të përfitojë nga veprat e tij në një kohë kur ai do të ketë nevojë më së shumti (d.m.th në Ditën e Gjykimit). Për këtë arsye, All-llahu tha: "... e ata nuk mund të realizojnë asgjë nga veprat që kanë bërë"
Për këtë arsye, ata nuk do të jenë në gjendje për të fituar ndonjë shpërblim apo dobi nga veprat e tyre në ditën e gjykimit. Kjo është për shkak se All-llahu nuk pranon asnjë vepër, nëse nuk bëhet sinqerisht për hir të Tij dhe në përputhje me atë që Ai e ka nxjerr si ligj .
Veprimet janë të katër llojeve. Vetëm një lloj është i pranuar dhe tre të tjerat janë të refuzuara. Vetëm kur veprimi është Al-Halis As-Sauab (i pastër dhe korrekt), është pranuar. El-Halis është sinqeritet për hir të All-llahut të Vetëm dhe askush tjetër pos Tij. As-Sauab do të thotë veprimi i cili duhet të bëhet sipas mënyrës se si All-llahu ka kërkuar nga gjuha e të dërguarit të Tij (d.m.th. sipas sunnetit).
(Tre llojet e tjera janë:
1. Veprat që nuk janë as për hir të All-llahut, as me sunnet,
2. Veprat që janë për hir të All-llahut, por jo sipas sunetit
3. Veprat që janë sipas sunetit, por nuk bëhen sinqerisht për hir të All-llahut.
Këto tre lloje të veprave janë refuzuar, ndërsa vetëm lloji i parë i veprës - Al-Halis As-Sauab - është i pranuar nga All-llahu.)
Ka një sekret të thellë në përngjasimin (nga All-llahu) e këtyre ( llojet e veprave të refuzuara) me hirin. Hiri vie pas ndezjes së lëndëve të zjarrit. Për këtë arsye veprat e tilla janë ushqim i zjarrit (që do të shkatërrohen) . Dhe ky do të jetë lëndë e zjarrit nga i cili banorët e saj do të piqen.
All-llahu do të sjellë (më shumë) zjarr dhe dënim nga veprimet e tyre të rreme, ashtu si Ai sjell lumturi dhe kënaqësi për njerëzit veprat e të cilëve janë thjesht vetëm për hir të Tij dhe janë në përputhje me urdhrin e Tij.
Zjarri do të shkatërroj (një nga llojet e refuzuara) veprimet e tyre derisa ato të kthehen në hi. Prandaj, njerëzit e tillë, veprimet e tyre, dhe atë që adhurojnë ata, pos All-llahut, do të jenë lëndë e zjarrit.
- Nga Ibn Kajjim el-Xheuzije në Tefsirin El-Kajjim fq. 326-327
Përktheu dhe përshtati: Naim Berisha