Teksas: 13 të vrarë në bazën ushtarake
13 njerëz janë vrarë dhe 31 janë plagosur kur një ushtar ka hapur zjarrë në një bazë ushtarake në Teksas.
Të shtënat në Fort Hood konsiderohen më vdekjeprueset të kenë ndodhur ndonjëherë në një bazë ushtarake në Shtetet e Bashkuara.
Autoritetet kanë plagosur sulmuesin, i cili tash thuhet të jetë në gjendje stabile.
Presidenti amerikan, Barak Obama, e ka quajtur këtë sulm "si shpërthim të tmerrshëm dhune".
"Ka pasur të shtëna tragjike në bazën ushtarake Fort Hood në Teksas.
Ne për momentin ende nuk i dijmë detajet e ngjarjes, dhe do t'i ndajmë sapo t'i marim.
Ajo që dimë është se një numër i ushtarëve amerikanë janë vrarë, dhe shumë më tepër janë plagosur në këtë shpërthim të tmerrshëm të dhunës", tha presidenti Obama.
Sipas tij, Shtëpia e Bardhë është duke punuar ngusht me Pentagonin, FBI-në dhe Departamentin e Sigurisë Kombëtare për të mundësuar që baza Fort Hood të jetë e sigurt dhe në këtë drejtim "do të shfrytëzohen të gjitha mjetet e qeverisë federale" për ta ndihmuar këtë bazë dhe qytetin përreth.
"Është mjaft e vështirë të përballemi me humbjen e atyre amerikanëve të guximshëm në betejat jashtë vendit.
Është ndërkaq e tmerrshëme kur ata sulmohen me armë zjarri në një bazë ushtarake në tokën amerikane", ka thënë presidenti amerikan.
Brenda kësaj baze, lejtnant-gjenerali Bob Koun, tha se të shtënat kishin filluar në mesditë të ditës së djeshme, në hapësirën ku bëhen skanimet mjekësore të ushtarëve për zbarkimin e tyre në poste jashtë vendit.
Agjencia e lajmeve Associated Press, duke cituar burime anonime, ka njoftuar se sulmuesi është identifikuar si major Malik Nadal Hasan, psikiatër i ushtrisë.
Major Nidal Malik Hasan, sulmuesi i dyshuar
Senatorja e Teksasit, Kej Bejli Haçison nga Teksasi tha se kishte njoftime se Hasan pritej të zbarkonte në Irak dhe kjo e kishte zemëruar atë.
Baza Fort Hood është mbyllur pas të shtënave dhe të plagosurit janë dërguar në spitalet rajonale.
Ndryshe, kjo bazë është baza më e madhe aktive në Shtetet e Bashkuara, ka një hapësirë prej 878 kilometrash dhe është shtëpi e më shumë se 50 mijë trupave ushtarake. (evropa e lire)
