Pas deklarimit të hapur të Klodit si homoseksual në Big Brother, jashtë shtëpisë më të famshme të Shqipërisë janë ngjallur polemika të shumta. Lezha ishte objekt i protestave të shumta, që është dhe vendi ku jetojnë prindërit e Klodit, të cilët, gjenden nën presion enorm nga shoqëria, faktor që ndikoi në shpërnguljen e tyre.
Për këtë qëllim, ambasadori amerikan John Withers dhe ambasadori gjerman Bernd Bochardt vizituan Lezhën me ç’rast dhanë mesazhe afirmimi të personave në pakicë seksuale duke pohuar se ashtu siç jetojnë shqiptarët me fe të ndryshme, ashtu duhet të jetojnë edhe në pakica të ndryshme seksuale.

“Pas deklaratës së Klodit, mbi prirjet e tij homoseksuale dhe deklaratës së nënës së tij për mbështetjen, ka pasur persona në Lezhë të cilët kanë folur në mënyrë homofobike. Unë i respektoj dhe nuk i sfidoj të drejtat e këtyre personave për të shprehur haptazi lirinë e tyre. Unë gjithmonë kam për të respektuar lirinë e fjalës”.

“Në fakt kur liria për të folur e shprehur në veprime armiqësore dhe kërcënuese, saqë familja Çela detyrohet të braktisë shtëpinë e saj, kjo shndërrohet në formë diskriminimi. Klodi ka të drejtë edhe zonja Çela ka të drejtë të ecin e jetojnë të lirë në këtë qytet. 2 deri në 5% në mbarë botën janë homoseksualë edhe ato duhet të respektohen ashtu si edhe Klodi. Duhet të jemi tolerant dhe të respektojmë të drejtat e çdo njërit, pavarësisht prirjeve të tij seksuale”, tha Withers nga Lezha.

Ambasadori gjerman Borchardt përmbylli fjalën e rastit duke thënë: “Vazhdoni të bashkëjetoni me pakicat, qofshin etnike, fetare apo seksuale!”