[You must be registered and logged in to see this link.]Agjencia informative iraniane ka bërë të ditur se ka gjetur mënyrën për të mposhtur një virus kompleks kompjuterik i cili ka hyrë në dhjetëra mijëra kompjuterë në vend dhe për të cilin ekspertët e huaj konsiderojnë se është i drejtuar kundër programit nuklear iranian.
Virusi është zbuluar në kompjuterët në centralin atomik në Bushehr.
“Shërbimi informativ iranian ka gjetur zgjidhjen për luftën kundër virusit, i cili do të zbatohet”, ka thënë të shtunën shefi i agjencisë informative, Hejdar Moslehi.
“Dominimi ynë në rrjetet virtuale ka parandaluar aktivitetet armiqësore në këtë fushë”, ka thënë ai.
Moslehi ka shtuar se autoritetet kanë arrestuar disa “spiunë nuklear”, por nuk ka dashur të japë kurrfarë detajesh.
Krimbi shkatërrues “staksnet” ka depërtuar edhe në sistemet kompjuterike industriale në Indi, Pakistan, Indonezi dhe SHBA, por më së shumti në Iran, ku është zbuluar dhe në kompjuterët e disa të punësuarve në centralin atomik Bushehr.
“Staksnet” ka befasuar ekspertët, pasi është virusi i parë i dedikuar për marrjen e kontrollit mbi sistemet industriale sikurse centralet, në vend se të vjedhë ose manipulojë me të dhënat, sikurse janë shumica e viruseve tjerë.
Ende nuk është e qartë se kush e ka krijuar virusin e sofistikuar dhe cili është caku i saktë i tij, por ekspertët vlerësojnë se prapa tij nuk qëndron vetëm një individ, por një organizatë e tërë, madje ndoshta edhe ndonjë shtet sikur Izraeli, apo SHBA-të.
