Reperi i shndërruar në aktor, 50 Cent, thotë të jetë inspiruar nga yjet e Hollywoodit, si Robert De Niro, Tom Hanks dhe Christian Bale, në humbjen e peshës për filmin e ri “Things Fall Apart”.
50 Cent në filmin e tij të ri luan rolin e një futbollisti amerikan të diagnostikuar me kancer, në një skenar të bazuar te një mik i tij që luftoi tragjikisht me vdekjen. Ylli i hip-hopit përdori një dietë të lëngshme, me ç’rast ai humbi 24.5 kilogramë, ndërsa imazhet e postuara nga trupi i tij skeletor, shokuan të gjithë fansat e tij.

“Unë fillimisht u kyça në kompjuter. Kur filloi të bëhej më e vështirë, unë shikoja përvojat e tyre dhe mu dha rasti t’i lexoja të gjitha intervistat e tyre në periudha të ndryshme kohore, kur ata ishin duke bërë promovime për projektet e tyre”, theksoi 50 Cent për AP.

De Niro humbi 15.9 kilogramë për filmin e tij “Taxi Driver” në vitin 1976, ndërsa të njëjtën peshë e humbi dhe Tom Hanks për rolin e tij si avokat homoseksual me AIDS në dramën e vitit 1993, “Philadelphia”. Të gjitha rekordet i theu Christian Bale, që humbi 28.6 kilogramë për pak muaj, në përgatitje për filmin e vitit 2004, “The Machinist”.