Rokeri veteran, Sir Mick Jagger, është duke mësuar se si ta mbajë veten gjatë performancave të drejtpërdrejta, sepse ai nuk mund të jetë më aq energjik në të gjitha koncertet.
Legjenda 66-vjeçare e “Rolling Stones”, është lëvduar shpesh për energjinë e tij të lartë, por është duke e pasur më të vështirë kohëve të fundit, për arsye të moshës së tij, ndërsa pranon se i duhet të marrë frymë gjatë paraqitjeve live.

“Pasi përfundon koncerti, unë jo gjithmonë ndjehem si 20-vjeçar! Pjesë e asaj se sa je i përgatitur fizikisht është se sa i lodhur ndihesh në fund. Mund të lodhesh për pesë minuta dhe të ndjehesh i rraskapitur, por duhet të rikthehesh për 30 minuta dhe duhet të ndjehesh absolutisht mirë. Nëse jo, atëherë nuk je i përgatitur fizikisht”.

“Mund edhe ta qetësosh veten, është sikur të luash tenis. Nëse e vëreni, tenistët, madje edhe ata më të shpejtët, shpeshherë pushojnë gjatë ndeshjes, marrin frymë dhe kthehen përsëri. Kështu është edhe në muzikë. Duhet ta qetësosh veten nëse dëshiron të jesh në top formë”, deklaroi Jagger për radion britanike Smooth. /