Shefi i misionit EULEX, Yves De Kermabon, ka deklaruar në Bruksel se “askush në Kosovë nuk mund të jetë mbi ligjin” dhe me këtë ka hedhur poshtë shqetësimet e SHBA-ve dhe disa shteteve tjera perëndimore, se hetimet e nisura kundër anëtarëve të Qeverisë për korrupsion mund të destabilizojnë Kosovën.
Me këtë, Kermabon, në debatin e nën-komitetit për siguri dhe mbrojtje të Parlamentit Evropian, është përgjigjur në pyetjet e raportueses së PE-së për Kosovën, Ulrike Lunacek, se si ai i sheh vlerësimet e Washingtonit dhe qendrave tjera perëndimore se vazhdimi i hulumtimeve të EULEX-it do të trazojë stabilitetin në Kosovë.

Shefi i EULEX-it, po ashtu, u ka thënë gazetarëve se nuk dëshiron të komentojë deklaratat e kryeministrit të Kosovës, Hashim Thaçi, se hetimet kundër ministrit të Transportit, Fatmir Limaj, dhe disa anëtarëve tjerë të qeverisë, “janë kryer në mënyrë jocivilizuese".

De Kermabon ka thënë se ajo që di është se Thaçi në takim me të gjithmonë i ka dhënë mbështetje veprimeve të EULEX-it dhe se ai kërkon të bëhet edhe më shumë dhe që kryeministri Thaçi të përfshihet personalisht, si edhe gjyqësori kosovar, në luftën kundër krimit të organizuar dhe korrupsionit.

"Ky është relacion partneriteti”, ka nënvizuar shefi i EULEX-it dhe ka shtuar se ai është i vendosur të vazhdojë këtë partneritet.

I pyetur se sa gjatë do të mbetet ministri Limaj, kundër të cilit është nisur hetimi, në pozitën e ministrit të Transportit, De Kermabon ka thënë se kjo është çështje e gjyqësorit i cili, sipas tij, është i pavarur.

I lutur të tregojë se si i ka pranuar presionet e SHBA-ve dhe disa qeverive perëndimore në lidhje me hetimet kundër Limajt, shefi i misionit evropian në Kosovë ka theksuar se askush nuk është mbi ligjin dhe se EULEX-i është në Kosovë të kryejë punën e vet.
"EULEX-i është në Kosovë që të mundësojë veprimin e drejtësisë larg çdo ndikimi dhe unë nuk ndalem në ato presione”, ka thënë ai.