Në Ditën Botërore të Mjedisit,të shtunën më 5 qershor, në oborrin e Ndërtesës së Re të Qeverisë (ish Pallati i Mediave), ministri i Mjedisit dhe Planifikimit Hapësinor, Mahir Yagcilar përuroi Stacionin për monitorimin e ajrit dhe Projektin për grumbullimin e mbeturinave të letrës dhe plastikës.
Që nga dita e shtunë, qytetarët do të kenë mundësi që në ekranin e Stacionit t’i lexojnë të dhënat për shkallën e ndotjes së ajrit PM, 2.5 dhe PM.10., kushtet e motit, matjen e metaleve të rënda si dhe parametra të tjerë meteorologjik.

Stacioni është vendosur në një pikë mjaft frekuentuese të automjeteve.

Për të shënuar Ditën Botërore të Mjedisit dhe përurimin e këtyre dy projekteve të përfunduara, të pranishëm ishin mysafirë të shumtë nga institucionet vendore dhe ndërkombëtare.

Manifestimin e shënimit të Ditës Botërore të Mjedisit, në Amfiteatrin e Ndërtesës së Re të Qeverisë, me një fjalë rasti e hapi ministri i Mjedisit , Mahir Yagcilar, i cili vlerësoi se, madhështinë e shënimit të kësaj dite e rrisin edhe më shumë dy projektet që e përuruara.

“Qytetarët e kryeqendrës së Republikës së Kosovës dhe së shpejti edhe qytetarët e të gjitha qendrave të tjera, do të kenë mundësinë që në çdo çast përmes ekranit, t’i shohin të dhënat për shkallën e ndotjes, të dhënat për motin, matjen e metaleve të rënda si dhe parametra të tjerë metrologjik”, tha ai.

Po ashtu, të shtunën filloi së implementuari edhe një projekt tjetër i rëndësishëm –riciklimi i mbeturinave të llërës dhe plastikës, projekt ky i cili fillon në institucionet e vendit, për t’u zgjeruar – siç premtoi ministri Yagcilar, shumë shpejt në mbarë vendin tonë”.