Qeveria e Kosovës ka paraparë në strategjinë legjislative për këtë vit procedim për miratim në Parlament të 126 ligjeve. Megjithatë, deri tani, kur ka kaluar gjysma e vitit kalendarik, Parlamenti ka miratuar vetëm 26 ligje.
Zv/kryeministri Hajredin Kuçi thotë se Qeveria i ka dhënë prioritet miratimit të projektligjeve, të cilat kërkohen nga raporti i progresit të Komisionit Evropian. Ai thekson se Qeveria, po ashtu, ka punuar në draftimin e disa projektligjeve shumë të rëndësishme, siç është ai për prokurimin publik apo edhe ligjet që kanë të bëjnë me rendin dhe ligjin.

Kryeparalmentari Jakup Krasniqi ndërkaq, ka thënë për Radio Kosovën se Kuvendi nuk ka kapacitet për miratimin e tërë strategjisë legjislative të Qeverisë për vitin 2010. Megjithatë, Krasniqi thekson se Kuvendi është i gatshëm të miratojë çdo projektligj që Qeveria do t’i procedojë Kuvendit për miratim deri në nëntor të këtij viti.

“Strategji legjislative është më madhe sesa është kapaciteti i Kuvendit për miratim. Shpresojmë që ligjet që vijnë deri në tetor dhe nëntor do të miratohen nga Kuvendi i Kosovës”, ka thënë Krasniqi.

Ndryshe, Agron Demi nga instituti GAP, i cili ka monitoruar punën e Qeverisë rreth strategjisë legjislative për vitin e kaluar dhe këtë vit, thekson se është e pamundur që Kuvendi të mund të miratojë këtë strategji deri në fund të vitit. Sipas tij, Kuvendi duhet të bëjë presion në Qeveri për procedimin sa më të shpejtë të tyre, ngase, deri tani, nga 126 projektligje Kuvendi ka miratuar vetëm 26 ligje.

Ndryshe, Kuvendi, kohëve të fundit, po përballet me problemin e mungesës së deputetëve dhe për mungesë kuorumi po ndërpriten seancat.