Zyrtarët e lartë të Danimarkës dhe të Kosovës e kanë nënshkruar në Kopenhagë kontratën, sipas së cilës Prishtina obligohet t’i pranojë të gjithë qytetarët e saj, të cilët nuk kanë fituar status të azilit në këtë vend, ka njoftuar ministria për refugjatë e Danimarkës.
Sipas këtij dokumenti, Danimarka dhunshëm mund t’i kthejë qytetarët e Kosovës, nëse atyre u është refuzuar statusi i azilkërkuesit, ndërsa nuk duan të kthehen vullnetarisht në Kosovë.

Kontratën e kanë nënshkruar ministrja daneze për Refugjatë, të jashtëm dhe integrim, Birte Ron Hornbek, dhe ministri i Brendshëm i Kosovës, Bajram Rexhepi.

Ministrja Hornbek ka vlerësuar se dokumenti paraqet “vazhdim të bashkëpunimit të mirë me Kosovën lidhur me çështjet imigruese”.

Sipas të dhënave të policisë shtetërore të Danimarkës, përfundimisht më 10 prill 2010, janë 19 vetë që presin të kthehen në Kosovë, derisa gjatë vitit 2009, në Danimarkë kanë kërkuar azil politik 119 persona nga Kosova.