Ministri i Punëve të Jashtme i Republikës së Kosovës, Skender Hyseni deklaroi të martën se marrëdhëniet Kosovë-Francë kanë hyrë në një fazë të re të dinamizimit, veçanërisht pas pavarësisë së vendit.
Ai këto komente i bëri të martën pas takimit me një delegacion të Komitetit kosovaro-francez për partneritet, kryesuar nga Christian Menard.

Duke i konsideruar marrëdhëniet me Maqedoninë, Malin e Zi dhe Shqipërinë si të shkëlqyera, Hyseni sa u përket marrëdhënieve me Serbinë, konfirmoi gatishmërinë e Kosovës për marrëdhënie të mira edhe me këtë vend fqinj.

Ai me këtë rast përsëriti qëndrimin se Kosovës dhe Serbisë i duhet të bisedojnë për çështje të karakterit praktik e që janë jetike për qytetarët e të dy vendeve, mirëpo hodhi poshtë çdo lloj skenari të mundshëm për bisedime për statusin apo për ndarje të Kosovës.

Hyseni në këtë takim potencoi synimin e Kosovës për anëtarësimin e plotë në OKB, BE dhe NATO. /Telegrafi/