“Dua të martohem me të”. Kështu ka deklaruar e mitura 12-vjeçare, pas kapjes nga shërbimet policore që e kishin shpallur në kërkim që nga fundjava e kaluar. Ndërsa i dashuri i saj u ndalua dje pasdite për kryerje të marrëdhënieve seksuale me të mitura. Ardian Ferra, 18 vjeç, me arsim 3 klasë, u ndalua pasi nga deklarimet e dhëna në polici rezulton se për 6 ditë rresht ka kryer marrëdhënie seksuale me dëshirë me 12-vjeçaren në banesën e tij.
Ambra 12-vjeçare, ende pa e kuptuar veprimin e ndërmarrë dhe hapin që do të hedhë në jetë, i është dhënë pasionit. Ka deklaruar se është larguar me dëshirë nga shtëpia dhe se i kishte vënë në dijeni familjarët për vendimin e saj.
Lajmi për vdekjen aksidentale të të atit duket se e kanë lënë disi indiferente të miturën, banore e lagjes 15, të njohur si lagjja “Spitallë” e Durrësit. Policia e ka gjetur vajzën 12- vjeçare të larguar nga shtëpia në emër të dashurisë. Vajza ka udhëtuar drejt Tiranës, bashkë me të dashurin e saj, po bashkë me të është kthyer sërish në Durrës, për t’u ndalur në ambientet e Komisariatit të Policisë së Durrësit.
Burime zyrtare të Policisë së Durrësit kanë konfirmuar gjetjen e saj dhe heqjen nga lista e personave të shpallur në kërkim nga blutë. Të dy janë shoqëruar në polici dhe pritet që prokuroria të vendosë mbi masën e sigurisë për 18-vjeçarin nga Tirana, duke vlerësuar rrethanat dhe moshën e së miturës.
Deklarimet e së miturës dhe të dashurit të saj se duhen dhe do të martohen bien ndesh me ligjin që përcakton qartë moshën për martesë. E ndërsa i dashuri i së miturës konsiderohet i rritur dhe i përgjegjshëm për veprimet e tij, 12-vjeçares do t’i duhet të presë dhe ca për të përmbushur dëshirën e saj për martesë. Ambra Bonjaku u gjet pesë ditë pas largimit nga shtëpia me të dashurin në kryeqytet, ndërsa në të njëjtën ditë një tjetër fatkeqësi e preku familjen e saj, motrat dhe vëllezërit.
I ati, Kujtim Bonjaku, u aksidentua me vdekje pak orë pas denoncimit në polici për largimin nga shtëpia të vajzës së vogël. Viktima ishte i divorcuar dhe baba i shtatë fëmijëve. Nga hetimet e kryera rezultoi se Kujtimi, ditën e aksidentit, ka qenë në gjendje të dehur, një gjendje që vijonte prej kohësh për shkak të jetës së vështirë dhe pamundësisë ekonomiko-financiare për të përballuar jetesën.
63-vjeçari Bonjaku po lëvizte me biçikletë kur është përplasur me një automjet të tipit BMW me targa të Kosovës 555-KS-900 që drejtohej nga shtetasi Shemsi Zhdrella, 35 vjeç, nga Podujeva. Ngjarja ndodhi në superstradën Durrës-Tiranë. Drejtuesi i automjetit u arrestua në flagrancë, ndërsa policia vijoi kërkimet për gjetjen e Ambrës 12 vjeçe.
Denoncimin në polici për largimin nga shtëpia e kishte bërë vëllai i saj 22-vjeçar. Pas gjetjes në Tiranë, prokuroria do të vendosë përkohësisht mbi fatin e kësaj lidhjeje dashurore që tenton të përfundojë në mënyrë të paligjshme në martesë, duke abuzuar me papërgjegjshmërinë e vajzës, për shkak të moshës, në marrjen e vendimeve të rëndësishme për jetën e saj. Ndërkohë 18-vjeçari Ferra akuzohet për veprën penale të marrëdhënieve seksuale me të mitur.
