Ministri i Administrimit të Pushtetit Lokal, Sadri Ferati, vlerëson lartë zgjedhjet e mbajtura në Partesh, komunë kjo e krijuar me procesin e decentralizimit në Kosovë, ndërsa ka falënderuar përfaqësuesit e institucioneve vendore dhe ndërkombëtare në Kosovë për kontributin dhe ndihmën që kanë ofruar lidhur me realizmin e këtij procesi.

Ministri Ferati thekson se me organizmin e zgjedhjeve në Partesh, Kosova po i realizon përgjegjësitë ndaj Pakos së Marti Ahtisarit, me sukses evident.

“Zgjedhjet e mbajtura dje (e diel) në Partesh, pa asnjë incident, treguan se kah po shkojnë proceset në Kosovë. Aty ku patëm qasje ne, suksesi është evident. Përqindja e qytetarëve që dolën në zgjedhje, dëshmuan vullnetin i tyre për të ju bashkuar institucioneve të Kosovës, këto janë veprime konkrete që treguan se gjerat kanë lëvizur në të mirë të vendit”, është shprehur Ferati.

Ministri thekson se me komunat e krijuara me procesin e decentralizmit po instalohen institucione të fuqishme lokale, që kanë marrë përsipër udhëheqjen e jetës, krijimin e barazisë qytetare dhe një kualitet më të mirë të jetës dhe kjo po dëshmohet me komunat e sapo- themeluara Graçanicë, Ranillug dhe Kllokot.

Lidhur me vazhdimin e decentralizmit në veri të vendit Ferati vë në pah se “situata në veri të vendit qëndron ndryshe dhe nuk varet vetëm nga komponentët e decentralizmit, kur kemi parasysh se aty fillimisht duhet të përgatitet tereni për tu mbajtur zgjedhjet, pra kërkon njëfarë mobilizimi të faktorëve si vendosja e rendi dhe sigurisë, drejtësisë që nënkupton prezencën e institucioneve tona atje, pastaj vjen në shprehje procesi i decentralizmit”.