Këngëtarja Juliana Pasha, që e përfaqësoi Shqipërinë në “Eurovision Song Contest 2010” në Oslo me këngën “It’s All About You”, ka thënë se votimi si zakonisht ishte politik edhe pse kënga e saj thotë se është konsideruar favorite nga gazetarët në Oslo.

“Përveç një emocioni të madh që të japin skenat gjigante, ishte ndjenjë krenarie ta përfaqësoja vendin tim. Jam ndjerë tepër e emocionuar teksa këndoja dhe shihja flamurë shqiptarë të valëviteshin kudo. Mediat na kanë pritur mjaft mirë, pati nga ata gazetarë, siç ishte rasti i një gazetari të ESC Daily që e pëlqeu aq shumë këngën tonë, sa që mbante në dorë flamurin shqiptar gjatë gjithë konferencës”.

“Në Oslo kënga u cilësua si favorite që prej provës së parë. Gazetarët e shihnin si pjesë të top dhjetëshes. Për fat të keq edhe ky vit vërtetoi edhe më shumë mënyrën se si votohet në këtë festival, ndonëse kishim shpresuar të jetë më ndryshe”, theksoi Juliana Pasha në një intervistë për Zhurnal.

Ajo shtoi se ishte njohur me disa nga këngëtarët që përfaqësonin shtetet e tyre, duke përfshirë këtu dhe fituesen nga Gjermania, Lena, për të cilën thotë se ka fituar për shkak të klikimeve të shumta në internet edhe pse ajo nuk pati ndonjë preferencë të veçantë se kush është dashur ta fitonte festivalin.