Vetëpërmbushja, individualiteti, njohja dhe respekti ndaj vetes, është kryefjala e mashkullit bashkëkohor dhe me shpirtin e lirë.
Mashkulli liberal, i hapur dhe i sinqertë me veten dhe botën, kurioz dhe meditativ është një tip që rrallë haset në vende patriarkale.
Ai është i ndjeshëm dhe lejon të gjitha ndjesitë të depërtojnë brenda tij spontanisht, pa u censuruar dhe sugjestionuar nga stereotipat sociale. Vetëpërmbushja, individualiteti, njohja dhe respekti ndaj vetes, është kryefjala e mashkullit me shpirtin e lirë.
Zëri i trashë e kumbues, nuk kanë fare të bëjnë me një mashkull të ndjeshëm, i cili përlotet shpesh.
“Qaj edhe kur shoh një film të trilluar”, pranojnë pa komplekse, shumica e meshkujve, ndryshe nga disa burra të tjerë të “fortë”, që në publik bëjnë një luftë të paparë me veten për të mos i shprehur ndjenjat.
Fjala vjen, e kam parë disa herë filmin “City by the sea” dhe jam përlotur çdo herë gjatë skenës së fundit, kur bëhet ballafaqimi tronditës i babait të shkujdesur (Robert de Niro) me djalin e lënë pas dore (James Franco). Dhe është më se e sigurt, që secili person pikëllohet sa herë që e sheh.
Meshkujt shqiptarë, janë rritur dhe edukuar në një familje tipike patriarkale dhe atëherë kur djali mësohet t`i ketë nën kontroll ndjenjat e të bëjë burrin në çdo rrethanë.
Por me kalimin e kohës shumica e meshkujve, pësojnë ndryshime pozitive, fillojnë ta shohin me sy kritik mjedisin patriarkal e maskilist, ku janë rritur dhe i shpallin luftë asaj pjese të vetvetes, që nuk e pëlqejnë fare.
Mashkulli optimist, i butë, i sjellshëm dhe i edukuar është një specie në dukje, sidomos në shoqëritë post-komuniste, ku për dekada me radhë respekti ka buruar prej frikës dhe simpatia prej vulgaritetit.
Ky tip mashkulli e kontrollon forcën dhe nuk e lejon atë të shndërrohet në dhunë, teksa ndjeshmëria e tij është katalizator ndryshimesh në ambientin ku jeton.