Google Wave, një produkt i cili besohej se do ta ndryshonte mënyrën e komunikimit për të gjithë ne, “nuk është më në mesin tonë”. Dikur, njerëzit madje e shisnin llogarinë e tyre në eBay për 70 dollarë.
Në një postim në blogun e saj, Google ka deklaruar se “ata nuk janë duke planifikuar të vazhdojnë zhvillimin e Wave, si një produkt të vetëm” edhe pse kodi i saj do të jetë në dispozicion si “open-source”.
Ky hap nuk duhet të na habis edhe aq shumë duke e marrë parasysh vështirësitë e kompanisë në integrimin e këtij shërbimi me Gmail, dhe hapjen e llogarisë vetëm përmes ftesave.
Mirëpo, ajo që është më interesante në këtë drejtim, është “shkëlqimi dhe rënia” spektakulare e këtij produkti të Google. Gjatë vitit 2009, Google Wave me siguri ka qenë produkti më i përfolur gjatë një periudhe të caktuar vitit, mirëpo vetëm disa muaj pas lansimit zyrtar, gjithçka ishte shuar për Wave, dhe zhurma për të u shndërrua në heshtje të plotë.
Bashkë me Wave, edhe Google Buzz ka shënuar një dëshpërim të madh të kompanisë, e cila gjithsesi po kërkon të bëjë diçka më shumë sa i përket përfshirjes së saj në rrjetet sociale.