Kuvendi i Kosovës, të enjten e ka obliguar Qeverinë, që brenda një kohe sa më të shkurtër t’i gjejë mundësitë e lidhjes së një memorandumi të mirëkuptimit me Entin Federal për Sigurime Shoqërore të Zvicrës, me qëllim që qytetarëve të Kosovës, të cilët kanë punuar në këtë shtet, t’u vazhdohet dhënia e pensioneve dhe shtesave për fëmijë. Kjo kërkesë ka dalë në saje të inicimit të interpelancës së kryeministrit Hashim Thaçi nga ana e deputetit të pavarur, Emrush Xhemajli. Shefi i ekzekutivit, është zotuar se Qeveria do t’i aktivizojë të gjithë mekanizmat e saj, si brenda ashtu edhe jashtë vendit, në mënyrë që shtetasit e Kosovës të mos u privohen nga një e drejtë, që aktualisht e gëzojnë të gjithë shtetasit e vendeve të dala nga ish-federata jugosllave.

Thaçi ka marrë kritika të shumta nga ligjvënësit që nuk ka reaguar me kohë për ta evituar vendimin e Entit zviceran, pasi, sipas tyre, paralajmërimi për ndërprerje të marrëveshjes së vjetër ishte bërë në dhjetor të vitit të kaluar. Ndërprerja e marrëveshjes Zvicër-Kosovë është bërë më 1 prill për shkak të shpërputhjes së legjislacionit të Kosovës dhe atij zviceran në fushën e sigurimeve shoqërore.

Ndërprerja e njëanshme e kësaj marrëveshjeje ka goditur mbi 170 mijë shtetas të Kosovës, që punojnë në Zvicër.

Zv.kryeministri, Hajredin Kuçi e ka pranuar se ka pasur një lloj neglizhimi institucional të këtij problemi dhe është zotuar se ndaj personave përgjegjës do të merren masa përkatës.